眾融之路，縱容之路
十一月六日聚會之後纏繞住一個問題，究竟not my channel要行o既係一條眾融之路定係縱容之路呢？我諗係我自己o既主觀投射或者渴望，初初阿仁提出o既時候我聽到o既係縱容。直到後來被Parkson指正同再聽清楚先攪清楚原來大家講緊o既係眾融。而家我諗緊o既係究竟縱容會唔會同可唔可以係眾融o既前題呢？o係八樓近年o既討論或者關懷裹面經常都會出現有關家或者家園o既講法。我諗大家都會明白呢種家或者家園o既講法並唔只係講緊血緣或者親屬關係o既家而係講緊一個寬廣意義o既家園。我經常都會諗，其實當大家o係度講緊家或者家園o既時候其實係諗緊或者想像緊乜野呢？呢種家園o既想像會唔會係渴望緊一個[我]會被接受/縱容而再發展o既地方呢？但係一個群體如果只有單向同迴避他人影響o既話，咁家園o既凝聚必然唔能夠形成。所以，一個雙向或多向同願意互相影響o既取態有需要成為一個群聚家園o既基礎。再進而延伸想像，呢一個基礎會唔會係打造眾融之路同建立一個大家想像中o既家園o既其中一條可行之路呢？彷似一個順理成章o既講法，但係我諗其中重有好多未知o既轉折。例如互相縱容之間個條線應該畫o係邊度呢？如果大家o既底線唔同，咁又可以點樣處理呢？係唔係可以期望大家o係互相影響之下形成共融o既可能呢？
「啊欠。喂！你唔係話寫會議記錄o既咩。做乜又o係度發up風呀。」水仙孽子就
係果種鐘意o係D咁o既時候彈出o離攪你o既朋友。
「我只不過想………」
「你只不過想搞到一個可以接受同縱容你去渲洩你o個一大堆古零精怪o既諗法o既地方o姐！」
維怡o係度寫緊社運電影節o既介紹呀，用咩o離介紹Zapatista條Storm in the mountain好呢？好，就呢句啦。」。而個句野就係，『讓我們一起行進，我們就是大地的顏色』。」
「係………不過我都唔係只係掍緊一個只係我自己可以縱容o既地方。自潰雖然過癮，不過都總係欠缺緊D野o既。」我心諗，成機插你個自戀怪一野先。
佢好似知我想點咁，「得得得，不過係唔係不斷o係度吹水就OK，就唔洗做呀。」
「我………」。都未有機會應佢，佢就已經走左佬。呀，你條友，算你走得快。
不過都o岩o既，剩係吹水就吹天花龍鳳，做就做到唔湯唔水就的確唔係好掂o既。
好，話說十一月六號晚，街頭獨立頻道o係八樓再聚。o係度o既有老菲，Parkson，阿仁，阿業，林森，阿Cat，維怡同我。傾左一大堆運作上o既野。
第一，經過左去蕪存菁然後再不限次數o既投票之後，終於決定左個英文名係「not my channel」。至於中文名就剩番兩個，分別係「非__頻道」同「眾融頻道」。o係老菲頗唔鍾意眾融，努力遊說，借助外力(掍當時o係八樓o既奔離同Lenny俾意見，不過佢地都唔理我地)，call埋不在場o既阿榮同薯堡之後，票數仍然係六比六，不分勝負。於是我就提出左，我地在場有八個人，不如我唔投票而大家一人投一票咁就可以必然分出勝負啦。跟住老菲提出不如投埋反對票啦。咁o係大家都覺得可行o既情況之下，決定性o既投票就開始啦。而結果就係，「眾融頻道」有六票贊成兩票反對而「非__頻道」就有一票贊成。咁大局已定啦。但係當我再問老菲係唔係真係好唔可以接受「眾融頻道」呢個名o既時候。佢就話佢其實覺得呢個名都幾難聽，但係大家意願係咁，其實佢都接受。呢個位我真係覺老菲好鬼死正。點解？唔知呀。講唔清。不過真係好掂。再諗再諗。言歸正傳，即係話我地決定左個頻道個名係「not
my channel眾融頻道」。
第二，個頻道o既設計方面o係大家flow左一大堆idea之後，就由阿仁番去度度個初稿下次再傾同決定。至於idea就有：
-要多D黑色
-圖像化
-人拖人
-一D野包住一D野
-人身電視頭
-蕉皮包蕉
-包皮包九
-花包香腸
-上闊下窄ｏ既漏斗
-電視伸出或伸入D野
-碎肉機
-黑色球體
-黑色球體上面有個電視螢光幕ｏ既C字形ｏ既圖像化設計
-黑色球體上面寫住「nmc」同「眾」字同埋o係度融緊
-滴緊野o既黑色球體
-黑框眼鏡
-黑色o既眼睛
-黑色乳頭
另外亦都提過Logo設計可能有需要有選擇性咁用唔晒上面o既idea。但係o係個台o既宣傳trailer度就可以盡量融合呢D
idea。
第三，器材方面決定左以下o既選擇，至於個站台o既setup同設計就因未有時間傾所以就大家各自番去諗諗下次聚會再傾同落實。
-Kawasaki GA1400A發電機一部
-十四吋電視三部
-有monitor DVD player一部
-一入三出AV box一個
除左發電機之外，其他野都未有詳細實料，所以Parkson同林森就負責分別去
check埋電視，DVD player同AV box o既料下次帶番o離再決定。都提過電視須要問清楚用幾多Watt電。
第四，每次街站我地自己製作o既半小時專輯方面就提左以下o既idea：
-SM混音
-旺角街頭
-同性戀在中學
-中學生被禁慾
-單親中心婦女訪問
-障礙之都
-居大
-Super School
-區選後話
至於製作方面大家都講下自己諗住可以同想參與o既部份：
老菲：一齊傾野
維怡：盡量一齊傾
阿仁：傾拍剪
我：九up，做野
森林：九up，擔抬
業大導：居大，Super School
阿Cat：冇所謂，有咩要幫就幫
Parkson：九up加泥工
跟住大家都flow左D有關旺角街頭呢個專輯o既野，不過因為時間關係，都係要下次再傾。
最後約左十一月十四號八點八樓再聚再傾。
「喂喂喂，五點啦，天光啦，攪掂未呀！捨得目訓未呀！」
咦，係水仙孽子定係維怡呢？不過，是但啦，都差唔多啦。好，大家十四號見
啦。早抖！
太利
十一月八
|
