七一遊行

原因

最初，這提議其實是羅小糕提出做錄像拍攝訪問的意見，我只是響應。原先希望訪問一些認識但不多在行動中見到的人。但七一當天盛況加上我是自己一人游走，在茫茫人海中找不到熟人，迫不得已之下只好硬著頭皮訪問不認識的街上人（除了出發前在家中訪問自己的妹妹）。

重看影帶，最大感覺，和羅糕相似，是發現自己的訪問技巧十分劣拙！（：ｐ）有很多其實可以問得詳細一些但自己沒有再追問，很多時人們又唔知我拍來做乜咁，甚至有人問我是否臥底拍來秋後算賬！當然也有人未開口問已經準備好發表意見。雖然過程進展緩慢，自己又戰戰兢兢，但最後發現原來也訪問了十六人。以下抽取了其中一些和被訪者的對答，可作參考：

一.【我的妹妹，十九歲，中學生。地點：家中】
問：你平時有冇參與過遊行架?
答：我印象中只係參與過一次，就係六四。那時是爸爸帶我去，但我那時是讀幼
稚園所以我不知發生甚麼事呢！
問：是嗎，爸爸有帶你去嗎?為什麼沒有帶我呢?
答：那時得我們兩人呢
問：八九那時?
答：好像是。爸爸說是。
問：啊!我完全不知道的!
答：在上水住那時呀。
問：搞錯呀!那你為何今天會去呢?
答：因為覺得政府好漠視民意囉。不是說一定不立廿三條，但唔想連修改法例
但政府都唔聽，覺得(政府)好一意孤行。 所以我覺得應讓政府知道市民的聲
音。

二.【九歲男童。地點：百德新街】
問：你平時會不會去參加遊行？
答：不會
問：那為什麼今次會來?
答：……點答呢?
問：你喜歡點答咪點答囉。
答：未來過嘛……之後我的姨媽又叫我來。

三.【孩子老豆。地點：維園門口】
問：為何來遊行？
答：好多野做得太過份，這句是真的，有好多野錯左真係要認囉，認左做返好
咪得囉，唔使話唔認嘛。好似阿松咁，做錯左野，斷正既，點解仲要攬佢呢。

四.【伯伯。地點：維園門口】
問：平時有冇去遊行？
答：平時冇遊過。
問：今次點解來呢？
答：睇唔順眼，因為佢立呢個法係箝制自由既，普通每一個人都會受影響，所
以我地要來反對。

五.【嬸嬸一。地點：維園門口】
問：點解來遊行？
答：反對廿三囉。
我信自由和人權。係咁多。

六.【嬸嬸二。地點：維園門口】
問：點解來遊行？
答：我?我睇到個掃把頭講野，我睇到好嬲呀。
問：你平時多唔多來遊行?
答：冇呀，第一次乍。

七.【兩父子，父親手抱三歲小孩。地點：維園門口】
子：打倒董建華！
問：之前有冇去開遊行?
父：好少。
問：咁今次點解會來?
父：為個靚仔囉。
問：你呢?你點解會來呀?
父：佢唔識架。

八.【一對夫婦。地點：柏麗酒店對出】
問：你地平時有冇去開呢d遊行架?
婦：遊行?有。
問：係咩呢?
婦：六四囉。
問：年年都去架?
婦：係呀。
問：冇呀，睇下你地點解會來參加呢個遊行既?
夫：冇乜點解架。都係反對廿三同埋一d社會壓力架咋。

九.【一個打扮入時的年青人。地點：灣仔軒尼詩道】
問：你平時有冇去開呢d遊行?
答：唔多。
問：即係有冇去過?
答：冇呀。
問：咁你今次點解會來遊行?
答：睇唔過眼政府d手段。同埋對於佢個施政好不滿囉，咁多年來。

十.【一個中年男人。地點：太古廣場附近】
問：你不嬲有冇去開呢d遊行?
答：嗯，我六四口個時有。
問：即八九年口個陣?
答：係，八九口個陣。但係之後就冇來喇。因為要工作。但今次點解今日會上來
呢，因為真係好失望，佢剩係顧住d商家，唔係顧d香港市民。點解我地要上來
呢？就係因為希望佢能夠唔好咁匆匆立法，因為有d真係好苛刻，唔可以接受，
係咪？所以點解我呢次拋低工作來呢，就係希望比個訊息佢，唔好漠視香港市
民既要求。個要求唔係好過態口者係唔係，因為原本冇架嘛，點解宜家要咁樣
做先。就好似警權你唔駛法庭的搜查令你都可以入屋拉人，咁第時我地市民要
去洗手間既，咁我地係咪要打電話問一問董建華，我地可唔可以去得洗手間
先。佢話唔得既咁我地咪膀胱生石!?係咪呀!?

十一.【一個紅髮一個金髮少年人，剛剛中五畢業。地點：高等法院附近】
問：你地平時有冇來過呢d遊行架?
紅：梗係冇啦。
金：冇呀，第一次咋。
問：咁你地今次點解會來既?
紅：因為冇乜都幾可咁多人架喇。
問：趁下熱鬧咁?
紅：係…六四又唔會去既，其他o個d又唔關我事，去ｏ黎做咩呀。
問：有冇嗌埋d同學一齊ｏ黎呀?
紅：咪嗌左佢囉
問：就係你地兩個
金：其他o個d唔肯ｏ黎囉。
問：有冇話都反對廿三條呀?
紅：有呀。
金：有呀，呢d一定有架喇。
紅：好誇張囉，因為，真係d內容。