警權•電影和新世代現實
---邱禮濤在社運資源中心
採訪：Lenny／王蘊慈　文字整理：彩鳳／灡力

非典前期，Herman新戲上畫，＜給他們一個機會＞強調年青人應有機會去走出自己的路．非常正面，積極，不容離棄的青春．我們去看了首映，後來更邀請Herman來社運資源中心傾偈....

警權
在電影中，有兩度出現警員的場景，但警察和市民間的關係，都非常和諧，體諒，真有為人民服務的態度．我們問Herman，作為一個擁有編導主權的導演，他為什麼選擇把警察予以純正面的素描．他說：

”我地真係有去做現場觀察，做資料搜集架．其實兩種警察都有．態度囂張既有，好好禮貌既亦有．但係我地就唔想太典型咁將警察變成單一咀臉．因為我好想呢個故事，係講一Ｄ真實既人物同事，而唔係刻意咁去講社會話題，我想世界美好Ｄ，電影對主人公公平Ｄ，唔想用以前既定Ｄ「問題少年」角度去拍呢班跳街舞既年青人，所以電影既取態比較唔係負面呈現。

電影
Herman上一部片＜等候董建華發落＞焦點提揭一個社會議題，受到國際注視和在地好評，但他從沒有意圖成為一個文化和藝術性的導演．他想更踏實的玩香港商業電影的遊戲．他說：

”想用電影「講野」，就要做到「平易近人」，俾更多人知道同明白．就好似社會運動一樣，要大眾一齊起哄，就一定要講得大眾都可以明白理解．如果只能令有同樣諗法同關心既人理解，最終社會效應係唔夠既。我都唔知己做唔做得到「平易近人」，但盡力做啦！要生存，一定要考慮商業社會既一Ｄ制抓，但係，亦唔會阻礙自己爭取去拍一Ｄ自己想拍既議題，不過我堅持老實，唔會呃老闆，會視乎自己的議價力量，取巧咁加入自己想做既野，例如用《黑鳥》Ｄ歌。「平易近人」既意思係：一）先唔好預左觀眾對議題或內容有先設既認知，咁響戲入便就會交代得清楚Ｄ，不至令一般觀眾模糊不清，例如有人比較〈等候董建華發落〉同〈千言萬語〉兩部片，〈千言萬語〉可能需要觀眾對個Ｄ年代既人同事有基本印象，唔係，就會唔明白電影入便講既水上新娘、吳仲賢等等事同人，未必咁容易明白電影想講既故仔。每個導演都可以選擇唔同既方式去講故仔，〈等候董建華發落〉則選擇先預觀眾對事件一無所知，由戲交代事件背景和發展，那些年青犯點解俾人遺忘，佢地身邊Ｄ人又做左Ｄ乜。
二）係用簡單既語言去講議題，好似要講反戰，最容易令觀眾明白理解，就係用電影表達戰爭帶來既傷亡，同令好多人變成孤兒等等。但係電影因其篇幅所限，係唔適合意圖去傳遞太深奧既觀點，只適宜等觀眾對議題有基本的印象，之後如有反思，再從文字或者其他途徑去探討較深層既了解。好似〈鋼琴戰曲〉，我就好鍾意，很清楚，很簡單，但就是反戰電影，主題強調左人既基本需要──饑餓，觀眾好容易就明白戰爭既為害。
對問題既「反省」係有唔同程度既，去到太極端亦未必好，而且有時仲講得唔清楚，倒不如簡單化Ｄ，而”簡單”既意思，就係令觀眾知道畫面係響度表達乜野，而且刺激到佢地再去思考。我自己Ｄ電影選擇較簡單既方式去俾觀眾思考一Ｄ社會議題。正如社會運動，有Ｄ人以平和方式，有Ｄ人選擇較激進既手法，其實都只係處理方式和程度既唔同，但係最終既目標係一樣既。”

新世代現實
在＜給他們一個機會＞中，有兩個對立行為，一是街舞的一幫年青人，因為被玩弄而以自己友朋的資源在街上ＤＩＹ演出，贏得街頭坊眾的激賞；但另一方面卻被劉德華看上，被邀到他的演唱會上表演，結局彷彿喻意著想依靠個人資源幹理想的人，最終都會被吸納入主流商業社會。Herman這樣回應：
”我唔認同跳街舞班細路需要上到建制認同既舞台先算成功，或者係部片既唯一結局，只不過真人真事確係咁樣，反而佢地搵朋友借野響街頭表演，贏到認同係編劇既安排，就係覺得，佢地跳街舞，就應以響街頭贏到認同更為重要．有無結局，佢地仍然生活緊，人既現實生活係無結局既，但觀眾睇戲，就需要一個結局，而呢部片個結局係原本既事實。
我亦唔會完全否定建制，其實最好建制內外既空間都可以共存俾Ｄ年青人有選擇。而且我覺得年青人無諗得咁複雜，可能佢地唔覺得建制內既空間(踏上舞台，參加劉德華音樂會)亦係好事，亦想得到認同。建制內或外，乜野係好和壞，係無結論既，人既成長好複雜，唔同既人會搵唔同既平衡點，唔同既社會文化亦會影響人既成長同選擇，唔可以一個人既理解去概括所有人既經驗和選擇。
青春就係有活力、唔識死、唔怕死、直接、有guts、考慮唔多、誠實、單純，諗野無咁複雜，誠．實呢樣真係好珍貴。我地成人待人接物，尤其是初初識會唔熟，你講野唔岩聽，禮貌上都唔會太咩野，但係後生既時候唔係咁，大家大大聲發表唔同既意見，用詞強硬，大家覺得可以接受，反而依家世故喇，客客氣氣，講野轉彎抹角……
今日年青人面對既社會現實，係一個完全同舊時唔同（異化？）既現實．我記得我細個時恆生銀行既廣告係叫人俾心機儲錢，歌仔都係咁唱，滴水成河；依家，則係叫Ｄ後生仔先洗未來錢，碌卡同女友去歐洲渡左假先，其他慢慢諗．思維向度完全唔同．如果我地關心年青人，就應該響呢種大勢之外，提供另一Ｄ機會同選擇．”